Balyoza Amerîka li Îraqê Alina Romanowski derbarê hilbijartinên Parlemana Herêma Kurdistanê de peyamek belav kir û got ku girîng e her kes beşdarî hilbijartinan bibe û dengê xwe were bihîstin.
Romanowski got,"Dengdan bingeha demokrasîyeke serketî ye. Her wiha em bang li hemû partî û kesayetên siyasî dikin ku bêyî tundî û tirsandinê hilbijartinên azad pêk bînin û hilbijartin nîşana gel bide."
Wê herwiha got: “Amerîka pabendî ewlekarî, aramî û serweriya Îraqê ye û bi hev re emê vê hevbeşîyê li gel hemû Îraqiyan û di nav de gelê Herêma Kurdistanê pêş bixin.”
Piştî helmeteke germ ji bo şeşemîn hilbijartinên Parlemana Herêma Kurdistanê ku roja 25ê Îlonê dest pê kiribû û di 15ê Cotmehê de bi dawî hat, îro Yekşemî 20ê Kanûnê hilbijartinên giştî dest pê kir.
Li çar parêzgehên Herêma Kurdistanê bi sedan nûnerên çendîn welat û rêxistinên xwecihî û navdewletî, di nav de Neteweyên Yekbûyî, çavdêriya hilbijartinan dikin.
Nûnerê taybet ê Sekreterê Giştî yê Neteweyên Yekbûyî (NY) li Îraqê Mihemed El-Hesen li Hewlêrê bi Serokê Komîsyona Bilind a Serbixwe ya Hilbijartinan re civiya.
Wî got,"Ev roj ji bo Kurdistanê rojeke dîrokî ye û em vê boneya demokratîk li gelên herêmê pîroz dikin. Em hêvîdar in her tişt bi aramî derbas bibe."
