Wezîra Derve ya Koreya Bakur Choe Son Hui ji ber erdheja wêranker ku li Tirkiyê û Sûriyê rû da û tê de zêdetirî 12 hezar kes mirin, peyameke sersaxiyê ji hevtayê xwe yê Tirk re şand.
Rêvebirîya Rewşên Awarte û Felaketê ya Tirkîyê (AFAD) di 03:19'an de ragihand ku hejmara giştî ya kuştîyan 12 hezar 391.
AFAD da zanîn ku heta niha 62,914 birîndar hene û 6044 avahî jî hilweşîyane.
Ajansa Reuters li ser zarê du jêderan dibêje ku karwanek ji şeş kamyonên alîkarîyê ji Tirkîyê ber bi Sûrîyê ve diçe, bi armanca ku îro derbazî alîyê din yê sînor bibe û alîkarîyê bigihîne wan kesên ku ziyan jiber erdhejê dîtine.
Erdheja Duşemê ku piranîya qurbanîyên wê li başûrê Tirkîyê ne, li bakur û rojavayê Sûrîyê jî zîyan peyda kiriye. Li gor agahîyên dawî yên Çavdêrîya Sûrî ya Mafên Mirov, bêtirî 3,500 kes di encama erdhejê de mirine.
Di nav wan deverên ku zîyan dîtine herêma Efrînê ye, bi taybet jî devera Cindirêsê.
Seroka Taywanê Tsai Ing-wen û cîgirê wê William Lai dê muçeyên xwe yên vê mehê tevlî hewildanên alîkarîya mirovî bo qurbanîyên erdheja Tirkîyê bikin, ofîsa serokatîya Taywanê roja Pêncşemê ragihand.
Girava Taywanê hewlên xwe didomîne jibo şandina alîkariyê bo Tirkîyê.
“Em hêvî dikin ku bi erkê xwe rabin jibo alîkarîya Tirkîyê ku welatê xwe di zûtirîn dem de jinûve ava bike,” ofîsa serokatîya Taywanê di daxuyanîyekê de got.
Tsai roja Pêncşemê serdana ofîsa nûnertîya Tirkîyê li Taipei, paytexta Taywanê, kir û sersaxî derbarê qurbanîyên erdhejê pêşkêşî Tirkîyê kir.