Koreya Başûr dê tîmeke lêgerîn û rizgarkirinê ligel kelûpelên bijîşkî bişîne Tirkîyê da ku alîkarîyê di hewildanên rizgarkirina qurbanîyên erdhejê de bikin. Tîm ji 60 karmendan pêk tê.
Hikûmeta Koreya Başûr ragihand ku ew herwiha wekî destpêk 5 milyon dolar jibo alîkarîyê pêşkêşî Tirkîyê dike.
Berdevkê Wezareta Berevanî ya Koreya Başûr, Jeon Ha Gyu, got ku wezaret van planan ligel ajansên peywendîdar birêve dibe da ku firokeyeke leşkerî karmendên rizgarkirinê û alîkariyê bigihînin Tirkîyê.
Rêxistina Bijîşkên Bê Sînor ragihand ku karmendekî wê li parêzgeha Îdlib ya bakurê rojavayê Sûrîyê di encama erdhejê roja Duşemê de hatiye kuştin.
Rêxistinê dîyar kir ku karmendê wê li jêr xanîyekê wêranbûyî hate dîtin û da zanîn ku malbatên hin karmendên din jî di encama erdheja bihêz de jiyana xwe ji dest dane.
Sebastien Gay, serokê tîma Bijîşkên Bê Sînor li Sûrîyê, got ku em bi bandara vê karesatê li hezaran xelkê şok û xemgîn in, ku di nav wan de jî hevkarên me û malbatên wan hene.
Gay dîyar kir ku navendên saxlemîyê li bakurê Sûrîyê li jêr fişareke mezin kar dikin û karmendên saxlemîyê jî bê rawestan dixebitin, ji ber ku hejmara kesên birîndar pir e.
Peyamên Berpirsên Îraq Û Herêma Kurdistanê Bo Qurbaniyên Erdhejê
Ofîsa ragihandinê ya Serokwezîrê Îraqê Mihemed Şîaa al-Sûdanî bi rêya twîtekê, helwesta li hember alîkariya ji bo qurbaniyên erdehja li Tirkiyê û Sûriyê ragihand û dibêje "di bin rêberiya serokwezîr de, Duşemê, Iraqê pireke esmanî ji bo Sûriyê û Tirkiyê vekir, ji bo şandina alîkariyên bilez, ku tê de alavên pizîşkî yên hawarçûnê, alîkariyên destpêkî, sitargeh, pêdiviyên alîkariyê, û derman û sotemeniyê pêk tê."
Peyama Serokwezîrê Herêma Kurdistanê Masrûr Barzanî
Masrûr Barzanî serokê hikûmeta Herêma Kurdistanê derbarê erhejê di twîtekê de got "Ji bo alîkariya qurbaniyên erdhejê, min ferman daye saziyên hikûmetê, Wezareta Tendirustiyê û Saziya Xêrxwaziya Barzanî ku li gel Heyva Sor di xebatên alîkariyê de li Tirkiye û Sûriyê hemahengiyê bikin. Ji bo vê yekê 3 tîmên hawarçûnê û 25 ambûlans amade ne."
Peyama Serokê Parlemena Îraqê Muhammed Halbusî
Di hesaba xweya fermî ya twîterê de Al Halbusî dibêje "Em ji dil sersaxiyê û hevgirtinê ji qurbaniyên erdheja wêranker ya ku li herêmên Tirkiye û Sûriyê pêk hatiye re pêşkêş dikin û piştevaniya xwe bi her du gelên cîran re bo derbaskirina vê dema xemgîn radigihînin.
Bo miriyan rehm û lêborînê dixwazîn, ji bo kesûkarên qurabniyan jî sebir û aramê û ji nexweşan re jî şîfayê dixwazîn."
Îsraîl Bo Alîkariya Erdhejê Tîmên Rizgarkirin Û Tendirûstiyê Dişîne Tirkiyê
Artêşa Îsraîlê dibêje, wan tîmeke lêgerîn û rizgarkirinê ya ji 150 endazyaran, tîmên tendirûstî û karmendên din yên alîkariyê dişîne Tirkiyê.
Artêşê got ku ew ê "alîkariya bilez di hewildanên rizgarkirinê de" pêşkêş bike.
Serokwezîrê Îsraîlê Benjamin Netanyahu got ku wî jî daxwaza alîkariyên mirovî yên ji bo Sûriyê ku bi rêya karbidestekî dîplomatîk hatiye wergirtin, pesend kiriye. Di navbera Îsraîl û Sûriyê da têkiliyên dîplomatîk nînin û her du welatan çend caran şer kirine, lê ji bo alîkariya mirovî niha daxwaza şandina alîkariyên Îsraîl bo Sûriyê li gor ajansa AP hatiye pesend kirin.