NY Dibêje Bersiva Erdhejê li Sûriyê Rastî Astengiyan Tê
Berpirsekî radebilind ê alîkariyên mirovî yê NY got ku ziyana li rêyan, kêmbûna sotemeniyê û hewaya dijwar a zivistanê li Sûriyê rê li ajansê digrin da ku bersiva erdheja roja Duşemê ya ku bêtirî 1,200 kes li welêt kuştin bide.
Kordînatorê NY El-Mostafa Benlamlih di hevpeyvînekê de bi rêya vîdyoyekê ji Şamê ji Reutersê re got: "Binesaziya wê ziyan dîtiye, rêyên ku me ji bo karên mirovî bikar dianîn ziyan dîtine... lê em bi baş dixebitin."
Wî destnîşan kir ku gelek kesên ku malên wan wêran bûne şeva xwe li derve an di nav otomobîlan de derbas dikin, pir caran di keşûhewa cemidî de, bêyî tiştên bingehîn mîna çakêt û doşekan.
Wî got ku Neteweyên Yekbûyî kar dike ku hemû alîkariyên ku ji destê wan tê bi lez û bez kom bike ji bo deverên ziyandîtî, hem li deverên di bin destê hikûmetê de û hem jî yên di destê opozisyonê de.
Biden ji bo Erdheja Tirkiyê Telefona Erdogan Dike
Serokê Amerîka Joe Biden îro piştî nîvro bi Serokê Tirkiyê Recep Tayyîp Erdogan re axivî. Wî dupat kir ku Amerîka amade ye ku ji bo bersivdana vê karesatê her alîkarîya pêwîst bide hevbenda xwe ya NATO Tirkiyê.
Koşka Spî ragihand ku serok Biden li ser navê gelê Amerîkayê sersaxî ji bo kesên ku di erdhejê de birîndar bûne an jî hezkiriyên xwe ji dest dane xwest.
Wî da zanîn ku tîmên Amerîkî zû belav dibin ji bo piştgirîya xebatên lêgerîn û rizgarkirinê yên Tirkîyê û hevrêziya alîkariyên din ên ku dibe ji kesên ku ketine bin bandora erdhejê, di nav de jî xizmetên tenduristî an tiştên bingehîn ên alîkariyê.
Di Encama Erdheja Tirkiyê û Sûriyê de Ta Niha 3,600 Mirî Hatine Tomarkirin
Di encama erdheja mezin roja Duşemê li Tirkiyê û Sûriyê de ta dema amadekirina vê raportê zêdetirî 3,600 kesan jiyana xwe ji dest dane û bi hezaran avahî hilweşiyane, di demekê de ku tîmên rizgarkirinê bi destan kavian radikin û li kesên sax digerin.
Hikûmeta Sûriyê û rizgarkeran got ku nêzîkî 1,300 kes li seranserê Sûriyê mirin.
Xizmetên hawarçûnê yên Tirkiyê ragihand ku 2,316 kesên din jiyana xwe ji dest dane û bi giştî 3,600 kes mirine.
Xizmeta hawarçûnê ragihand ku heta niha li Tirkiyê 7,340 kes hatine rizgarkirin û 13,293 kes jî birîndar bûne.
Li Tirkiyeyê ji bo miriyan 7 roj şîn hat ragihandin.
Cîgirê Serokê Tirkîyê Fuat Oktay ragihand ku di encama erdhejên wêranker de heta niha 2379 kes hatine kuştin, 14 hezar û 483 kes jî birîndar bûne.
Altun da zanîn ku di encama xebatên lêgerîn û rizgarkirinê de 7840 hemwelatî ji bin kavilan hatine derxistin.