Berpirsê Sîyaseta Derve ya Yekîtîya Ewrupa (YE), Josep Borrell îro Înê ragihand ku di danûstandinên bo vejandina peymana navokî ya bi Îranê de navberek hewce bûye û danûstandin hatine rawestandin.
“Di danûstandinên Vîyana de jiber faktorên derve navbereke hewce kir. Belgeya dawî ya peymanê ya bingehîn amade ye û li ser maseyê ye, " Borell li ser Twitterê got.
Borell bi berdewamî da zanîn ku wek kordînator wê bi tîma xwe re, bi hemî alîyên peymana navokî (JCPOA ) û Amerîka re bo çareserîya rewşa heyî û temamkirina peymanê hewlên xwe bidomîne.
Wî sedema navberdayîna danûstandinan wek faktorên derveyî nîşan da, lê zelal nekir ku ew faktor çi ne.
Rûsya hefteya borî daxwaza garantîyê ji Amerîka kiribû û gotibû ku ger peymana navokî jinûve were kar anîn nabe ku toleyên Amerîka yên dijî Rûsya bandorê ser hevîkarîyên navbera Moskow û Tehranê bike.
Berdevikê Wezareta Derve yê Îranê Seîd Xetîbzade di bersîva Borrell de got ku ev navberdayîn dibe ku bo çareserîya tevahîya pirsgirên mayî û vegereke dawîn ya ser maseyê pir giring be.