Wezîrê navxweyî yê Tirkiyê Alî Yerlîkaya roja Yekşemê got ku polîs 33 kesên gumanbar bi girêdana bi Dewleta Îslamî (Daiş) ve ku bi îdiaya amadekariya êrîşan berî hilbijartinên şaredariyan yên dawiya vê mehê dikirin, binçav kirin.
Wî li ser X'ê ku berê Twitter bû, got gumanbaran "berî hilbijartinên xwecihî yên bê, amadekarî dikirin û li benda kiryaran bûn". Hilbijartinên li seranserê welêt wê di 31ê Adarê de bên lidarxistin.
Polîsên Dijî Terorê li Sakarya ya bakurê rojavayê Tirkiyê di serdegirtinan de çek, pere û "belgeyên rêxistinê" bi dest xistin.
“Em ê rê nedin ti terorîstan. Em ê bi hewldanên bilind ên hêzên xwe yên ewlehiyê têkoşîna xwe bênavber bidomînin."
Tora endamên Daişê ji bo deverên şer piştgiriya darayî ji grûpê re peyda dikir, dema ku ji mizgeft û dibistanên olî yên neqanûnî kar dikir, wî got.
Tirkiyê di van 10 salên dawî de rastî gelek êrîşên girêdayî Daişê hat, di nav de jî êrîşa çekdarî ya li ser dêreke Stenbolê di Çile de ku di encamê de kesek hat kuştin.
Grûp her weha bi êrîşa herî kujêr a welat re têkildar bû, ku tê de zêdetirî 100 kes di mîtînga aştiyê de li Enqerê di Cotmeha 2015 de hatin kuştin.
Çavkanî: AP