Partîya Demokratîk ya Gelan (HDP) helwesta xwe ya referandumê îro bi civînekê li Stenbolê ji bîragiştî re eşkere kir. Berdevkê HDP'ê û nûnerê bajarê Ruha, Osman Baydemîr di civînê de got ku ewê di referanduma guherîna hin xalên qanûna bingehîn de bêjin “na”.
“Emê ji tek ziman, tek netew û tek rêber re bêjin “na” û em nahêlin ku pirçandî tunebe. Ji qanûna bingehîn ya 1924'an vir ve Kurd û çandên din, zimanên din û bawerîyên din rengên xwe di qanûna bingehîn de nedîtin,”Baydemîr got.
Baydemîr bal kişand ku hevserokên wan Selahattîn Demîrtaş û Fîgen Yuksekdag û parlementerên wan li zindanê ne û di paketa ku hikûmetê amade kiriye de azadî, dadwerî û demokrasî ji wan kesan re, ji Kurdan re, ji Alevîyan re tuneye.
Baydemîr bang li hemî hemwelatîyên Tirkîyê kir ku li hember darbeya sîvîl, rewşa awarte û biryarnameyên bi desthilata qanûnê re bêjin “na.”
Baydemîr îdia kir ku dijderketina guherîna referandumê dê ronî û xweşhalî ji gelên Tirkîyê re bîne.