Lîstikên Kupaya Ewrupa (Euro 2024) li Almanyayê didomin, pê re jî asta pêşbazîya di navbera tîmên beşdar de bilindtir dibe.
Di lîstikeke Grûpa A de roja Çarşemê Almanyaya mêvandar bi du golan Maracistan têk bir û bi wê serkeftinê derbazî qonaxa 16’an bû. Li pêş 54 hezar handeran li stadyuma Stuttgartê, Almanya bi golên Jamal Musiala û Ilkay Gundogan serkeftina xwe misoger kir.
Di heman grûpê de, maça Skotlanda û Swîsra bi encama 1-1 bidawî bû. Lîstik li stadyuma bajarê Kolnê pêk hat û bêtirî 42 hezar temaşevan lê beşdar bûn. Bi vê encamê, Swîsra digihêje xala 4’an di grûpê de û Skotlanda jî xala xwe ya yekê di vê qehremanîyê de bidest dixe.
Di lîstikeke din ya roja Çarşemê de, her yek ji Kroatya û Albanya xalek bidest xist. Maça ku li bajarê Hamburg li pêş bêtirî 46 hezar handeran pêk hat, bi encama 2-2 dawî bû.
Di heman Grûpa B de, îro Pêncşemê maçeke çaverêkirî di navbera Îspanya û Îtalyayê de tê kirin. Herdu tîm di gera yekê de serkeftin bidest xistin û ev lîstik derfeta wan e ku serkêşîya grûpê bikin. Lîstik li stadyuma AufSchalke li bajarê Gelsenkirchen yê rojavayê Almanyayê pêk tê.
Herdu tîm du berbijarên serekî ne îsal jibo bidestxistina Kupaya Ewrupayê.
Di Grûpa C de du lîstik tên kirin. Ya yekê di navbera Slovenya û Serbistanê de û paşê Denmarka û Îngiltera tên pêş hev.