Di Peqîna Efrînê de Gelek Kuştî û Birîndar Hene
Îro danê sibê peqîneke tund li nêzî çerxerêya Kawa ya bajarê Efrînê rû da û bi dehan kes hatin kuştin.
Li gor çavkanîyên ji hindurê Efrînê, peqîn bi rêya makîneyeke bombebarkirî pêk hatiye û di encamê de herî kêm 10 kes hatine kuştin û 30 kesên din jî birîndar bûne.
Çavkanîyan dîyar kir ku ti alîyekî peqîn negirtiye ser xwe, herwiha zerareke mezin giheştiye xanî û dîkanên derdora cîhê peqînê.
Her li herêma Efrînê, li nahîya Şera û piştî çend seetan ji peqîna sibê, mayîneke bi erebeyeke leşkerî ya komeke çekdar de hat peqandin.
Di encama wê de hate ragihandin ku 3 çekdar birîndar bûn.
Dîsa di çarçoveya ji hevketina rewşa ewlehîyê li deverên di bin destê Tirkîyê û komên çekdar yên girêdayî wê de peqînek li bajarê Ezazê çêbû û çekdarên koma El-Cebha El-Şamîyê kire armanc.
Li bajarokê Raî jî li pêş navendeke koma çekdar Sultan Murad peqînek bi motosîklekê çêbû û hejmarek kuştî û birîndar hene û nehat zanîn hejmara wan çend in.
Hêjayî gotinê ye ku li herêmên Tirkiyê dest daniye ser her dem peqîn rû didin, çalakvan vê yekê weke jihevketina rewşa ewlekaîyê nîşan didin.
Your browser doesn’t support HTML5
NR_31_10_2019_Afrin_Peqin.mp3