Navenda Rojava ya Lêkolînên Stratejîk li Efrînê paneleke bi sernavê (Ragihandin ligelçûna Şoreşa Rojava) de, li dar xist.
Di panelê de hejmarek rojnamevan û rewşenbîr beşdar bûn û babetên weke, rol û bandora ragihandinê di şoreşa Rojava de, pirsgirêkên ragihandinê li Rojava û sedemên wan, herwiha çawa rola ragihandinê tê aktîv kirin, hatin nîqaş kirin.
Bêrîvan Sîdo, endama rêvebirîya Navenda Rojava li ser vê panêlê û armancên wê wiha axifî: "Nîqaşeke cidî di panelê de hate kirin, em bi hêvî ne hemû nêrînên hatine gotin û encama ku derketîye, rê li ber rastkirineke ragihandinî çêke".
Mêvanên panelê jibo çareserkirina pirsgirêkên ragihandinê û rakirina asteng û rêgirîyên li hember rojnamevanan, nêrîn û pêşnîyarên xwe anîn ziman.
Rojnamevan Îbrahîm Îbrahîm ji wiha nêrîna xwe dîyar dike: "Tê xwestin ku ragihandin li Rojava pêş bikeve, ta di asta şoreşê de be, û çi pirsgirêk hebe bi alîkarîya hemû alîyan were çareser kirin".
Rojnamevanên hazir panel weke gaveke girîng dîtin ku kesên di ragihandinê de dixebitin werin cem hevda ku karê xwe rêkûpêk bikin û ragihandina Rojava aktîvtir bikin.
Rojnamevan Kendal Şêxo jî civîna xebatkarên ragihandinê wek derfeteke girîng bi nav kir. "Ev civîn têkîlîyên nav xebatkarên ragihandinê de xurt dike û pevguhartina nêrînan jibo pêşxistina karê rojnamegerîyê li Efrînê pêk tîne."
Di dawîya panelê de hin encam hatin derxistin û ji alîyên peywendîdar yên Rêvebirîya Xweser re hatin nivîsîn. Di encamnamê de darxistina workşopan û çêkirina pirsnameyan û herwiha rêdana alavên ragihandinê ku bi hêsanî bixebitin û sazûmankirina karê ragihandinê li Rojava.
Your browser doesn’t support HTML5
Panêlek derbarê Raghinadinê li Efrîn