Kargirîya Şûnwaran bi alîkarîya Yekîtîya Reşenbîrên Efrînê semînereke şûnwarî li Şehba li dar xisitin.
Di semînerê de arkolocîst Selah Sîno panêlek da û dor cihên şûnwarî li Efrînê û girîngîya wan axivî, herwiha rewşa van cihan piştî destdanîna Tirkîyê û komên tundrê hate nirxandin.
Sîno bi wêne û dîmen dîyar kir ku zerareke mezin gihiştîye şûnwarên Efrînê, çi bi sedema topbaranê çaxê şer, yan jî piştî destdanîna ser Efrînê ku cihên dîrokî rastî dizîn û talankirinê hatine.
Dor vê semînerê rêvebira kargirîya Şûnwaran Asmehan Ehmed ji me re axivî: “Armanca semînerê em agahîyan dor rewşa şûnwarên Efrînê parve bikin û rewşa cihên şûnwarî nasbikin, bi taybet piştî êrîşa Tirkîyê ser Efrînê”.
“Di vê derbarê de emê daxuyenîyeke şermezarkirinê bidin bîra giştî û bang li alîyên navneteweyî dikin kiryarên Tirkîyê dij şûnwarên Efrînê rawestîne” Ehmed got.
Di semînerê de bi dehan rewşenbîr amade bûn, û nêrîn û helwesta xwe dor gavên pêwîst jibo parastina şûnwarên Efrînê parve kirin, roman-nivîs Idrîs Mamed hizra xwe di vê mijarê de ji me re şîrove kir.
“Çi êrîşa bixwaze miletekî qir bike, berî her tiştî ziman, çand û dîroka wî dike armanc, çimkî ew nîşaneyên hebûna wî gelî ser vê axê ne, loma divê em xwedî li şûnwarên xwe li Efrînê derkevin, ku rastî êrîşa Tirkîyê hatine û gilîyan li dozgerîyên navdewletî vekin sebî pirsyartî ji Tirkîyê bê xwestin”.
Herwiha Heyhan Elî girîngîya razberî ya şûnwaran tîne ziman, ku şaristanî û dîroka gelan di wan de veşartî ye, loma timî cihên şûnwarî li Kurdistanê tên armanc kirin.
Elî rola divê rewşenbîr pê rabin vedibêje: “Li kêleka êrîşa dijî gelê me û kuştina sivîlan, dewleta Tirk dixwaze dîroka me jî bikuje, û şaristanîya me ji nav bibe, loma ji rewşenbîran tê xwestin vê dîrok û şaristanîyê ji bîr nekin û bi pênûs û xebata xwe wan bidin nasîn”.
Hêjayî bi bîrxistinê ye ku di êrîşa xwe ya ser Efrînê de artêşa Tirk û komên tundrê çendîn cihên şûnwarî yên kevnar li Efrînê rûxandibûn yan jî hatibûn dizîn û talan kirin, weke Perestgeha Eyndarê, Keleha Nebî Horî, Kenîseya Jolyanos li Beradê û Mezargehên Êzîdî.
Your browser doesn’t support HTML5
Raporta Newroz Reşo