Ajansa zarokan ya Neteweyên Yekbûyî îro Înê hişyar kir ku jiber kêmbûna alîkarîya diravî ji dewletên cîhanê, dora 9 mîlyon zarokên Sûrî yên hindur û dervayê welêt di rewşeke krîtîk de ne.
UNICEF da zanîn ku di budceya programên wê yên derbarê Sûrîyê de kêmahîya 220 mîlyon dolaran heye û ew yek ji sala 2011ê vir ve rewşa herî xirab e.
UNICEF jibo sala 2017an banga 1.4 mîlyar alîkarîya diravî kir ku jibo xizmetên alîkarî û perwerdeya zarokên sêwî, bêcîhûwar û ji şerê navxweyî yê Sûrî zarar dîtine, pêdivî ye.
Ajansa penaberan ya Neteweyên Yekbûyî (UNHCR) roja Sêşemê ragihandibû wê heta niha karîye tenê 29 mîlyon dolarên ji budceya xwe ya $153 mîlyon dolaran bicivîne.
UNHCRê bal kişandibû ser hewcedarîyên nêzî 100,000 sîvîlên Reqa ku niha Hêzên Sûrîya Demokratîk (HSD) li wî abajarî operasyoneke mezin didomîne.