Hêzên Sûrîya Demokratîk (HSD) ragihand ku ew jibo rûbirûbûna her êrîşeke bejahî ya artêşa Tirk amade ne.
Endama fermandarîya giştî ya HSD'ê Newroz Ahmed di preskonfranseke onlaynî de rewş û pêşhateyên dawî li herêmê ku di encama êrîşên Tirkîyê de derketine û metirsîya van êrîşan li ser ewlehîya herêmê, şîrove kirin.
“Her çiqas hîn tu liv û tevgereke berçav jibo êrîşeke bejahî ji alîyê Tirkîyê ve tune be jî, amadekarîya vê yekê jibo Tirkîyê pir dem naxwaze. HSD vê gefê cidî digire û jibo bersîvdana çi êrîşekê amade ye,” Ahmed wek bersîva pirseke Dengê Amerîka got.
Di bersîva pirseke me ya din ya derheqa helwesta Rûsya ji gefên Tirkîyê ku herêmên Kobanê û Rojavayê Firatê, anku Minbic û Şehba ye, Ahmed got ku danûstandin bi Rûsya û hikûmeta Şamê re ser van herêman berdewam in ku helwesteke hevbeş li hember êrîşan hebe.
Ahmed got ku gava êrîş çêbe û Rûsya û rejîma Sûrî bê helwest bimînin yan xwe paşve vekişînin, wê demê têkilîya wan bi wan wê biguhere.
"Ger êrîşek çêbe, Rûsya û hikûmeta Şamê bê helwest bimînin, wê çaxê têkilîya me û wan, herwiha hebûna wan li ser erdê, wê wisa nedome çimkî hevsengîyên li herêmê tên guhertin û şer wê tenê li herêmekê nemîne.”
Ahmed bal kişand ser metirsîya êrîşên Tirkîyê ku gelê herêmê were koçber kirin û ewlehîya herêmê têk biçe, wê çaxê 5 mîlyon kes ku li herêmê dijîn, dikevin rewşeke xeternak.
Hêjayî gotinê ye ku ji 20'ê Mijdarê û vir ve artêşa Tirk herêmên bakurê Sûrîyê bombebaran û topbaran dike, herwiha karbidestên Tirk gefa operasyoneke bejahî dixwin.