Di hevpeyvîneke taybet ya Dengê Amerîka de Qasim Şeşo, yek ji rêberên hêzên Êzîdî li ser rewşa Şengalê agahîyên girîng dide.
Birêz Şeşo dibêje bi sedan xortên Êzîdî li herêmê ne û hewil didin ku tola xuşk û birayên xwe ji DAÎŞê rakin.
"Em hez dikin şerê DAÎŞa hov bikin, lê çekên me tune. Em ji Amerîka û civata navnetewî dixwazin ku çekên pêşketî bidin me."
Şeşo dibêje, ew ne fermandarê hêzên pêşmerge ye, lê wek mirovekî Êzîdî li Çîyayê Şengalê ye û hewil dide ku axa xwe biparêze.
"Ez tenê xizmetkarê Êzdîxanê me û armanca me, ligel van xortana, ev e ku em şerefa xwe biparêzin."
Li ser probleman bi YPG re jî, Şeşo dîyar dike ti problem nemane û her tişt çareser bûye.
"Kesekî ne girîng hîn tiştên xelet kirin. Lê, bi hatina birêz Zekî Şengalî û hevalên din ew şaşfemkirin hate çareser kirin."
