Li Tirkîyê hejmarek zêde partî, sazî û komele derketin qadan ku îro wek “9’ê Cotmehê destpêka komploya bo girtina Rêberê Partîya Karkerên Kurdistan (PKK) Abdullah Ocalan” qebul dikin, xwepêşandan li dar xistin û ev roj şermezar kirin.
Xwepêşandanên ku bi dirûşmeya “Em bo azadîyê dimeşin” bi pêşengîya Partîya Demokratîk ya Gelan (HDP)ê pêk hat û bi van çalakîyan daxwaza azadîya Ocalan hat xwastin.
Lê hêzên ewlekarîyê bi îdiaya binpêkirina qanûnan, destûr neda xwepêşandanên HDP’ê.
Di meşa bajarokê Gevera (Yuksekova) Colemêrgê de polîsan êrîşî girsehê kir û 3 rojnamevan jî di nav de 20 kes desteser kirin.
Di heman bûyerê de parlamenterê HDP yê Îdîrê Habîp Eksîk giran birîndar bû û ew veguhastin nexweşxaneya Geverê. Hat zanîn ku lingê Eksîk ji du cihan re şkestîye.
Li Wanê jî, rûniştvanan xwest bi pêşengîya HDP’ê li kolana Hunerê kom bibin, lê hêzên ewlekarîyê ew dorpêç kirin û êrişî girseyê kirin. Li gor HDP’ê polîsan herî kêm 55 kes desteser kirin.
Li gor Ajansa Mezopotamyayê, di xwepêşandanên li Wan, Colemêrg, Riha, Îzmîr, Amed û Stanbolê de 139 kes hatine desteser kirin.
