Wîlayeta New York li Amerîka rastî ziyanek mizin bûye ji ber vîrusa Korona, ku roj bi roj rêjeya nexweşan û qurbaniyên vê vîrusê zêde dibin li himberî wê hikûmet û niştecihên wê xebatak bê hempa dikin ji bo parastinê.
Dengê Amerîka xwest ku ji nêzîk ve karîgeriya vê vîrusê li ser jiyana xelkên New York nas bike û çawa rojên xwe derbas dikin, hevpeyvînek bi Kulîlk Hesko re kir, ku ew xanimek ji kurdên Efrînê ye, ji 10 salan ve tevî 2 kur û hevjînê xwe li New Yorê dijîn.
Xanim Kulîlk anî ziman, ku ziyanek mezin li rewşa xelkê bûye ji ber vîrusa korona, û bi taybetî rewşa abûrî ya xelkên wê.
Her wiha jî wê got ku piraniya malbatan li malê xwe tiştên nû diafirînin ji xwarin, lîstokên zarokan, û hin tiştên din da ku dema xwe derbas bikin û karibin jiyanê bi hev re derbas bikin.
Di dawiyê de wê got ku :"Niha em qîmeta azadiya xwe nas dikin, dema ku bi serbestî çûn hatinê dikin, lê niha em di malan de asê mane, bê çar bûne..min bêriya wê azadiyê kiriye."
