Kongreya Netewî ya Kurdistanê (KNK) bi daxuyanîyekê nivîskî piştgirî da banga Abdullha Ocalan, damezrînerê girtî yê Partîya Karkerên Kurdistanê (PKK).
“Wek Kongreya Neteweyî ya Kurdistanê - KNK, em girîngîya banga dîrokî ya Birêz Ocalan fêm dikin û jibo bangawazîya birêz Ocalan piştgirîya xwe yatam tînin ziman. Emê jibo serketina vê derfetê bixebitin, û emê jibo çareserîya aştîyane û demokratîk hemû derfetên xwe bi kar bînin.“
KNK armancên banga Ocalan bi wî awayî pênase kir.
“Ji vê bangê armanc aştî ye, armanc li Tirkîye û Kurdistanê avakirina civaka demokratîk e, armanc pêşxistina sîyaseta demokratîk e, armanc demokratîk kirina tevahîya Tirkîyê ye, armanc bi rêya aştî û dîyalogê çareserîya pirsgirêka Kurd e."
KNK bal kişand ku banga Ocalan jibo gelek alîyan e: Dewleta Tirk, PKK, hêz û sazîyên navneteweyî û ji bîragiştî ya cîhanê.
"Ev bang ji gelek alîyan re ye. Banga serekî ji karbidestên dewleta Tirk re ye, ku divê şer rawestînên, pêşîya sîyaseta demokratîk vekin, şertên xebata azad ya Birêz Ocalan ava bikin, pirsgirêka Kurd bînin parlamentoyê û bi awayekî demokratîk çareser bikin."
Kongreya Netewî ya Kurdistanê banga Ocalan ji alîyê Kurd re ku xwe li gor sîyaseta demokratîk jinûve rêxistin kirin û bi pêşvexistina sîyasetê ve devberdana ji çekan e.
KNK got ku banga Ocalan ji hêz û sazîyên navneteweyî û ji raya giştî ya cîhanê re ye ku ew di pirsgirêka Kurd de bibîn û alîgîrê çareserîyek demokratîk bin.
“Di vê çarçovê de em bang li dewleta Tirk dikin ku vê derfeta dîrokî ji destê xwe bernede û bersîvên erênî bide vê bangê û rêya sîyaseta demoratîk veke û pirsgirêka Kurdî bi rêya dîyalogê çareser bike. Heta niha bertekên navnetewî baş in, lê têr nakin. Em bang li hêzên cihanî dikin û dibêjin tenê gotin têr nakin, divê hemû aktorên têkildar vê derfetê bi kar bînin û rola xwe ya aştî û dîyalogê bilîzin,“ KNK got.
Kongreya Netewî ya Kurdistanê jibo piştgirîya peyama Ocalan û li partî û rêxistin û bîragiştî ya Kurd kir.
“Em bang li hemî partî û rêxistinên Kurdistanî û hemê gelê Kurdistanê dikin ku vê dema hestyar de em hemî bi hev re tevbigerin, piştgirîya Banga Aştî û Civaka Demokratîk bikin, yekîtîya xwe xurttir bikin, tekoşîna aştî û demokrasîyê bilind bikin.”
Rêberê PKK’ê Ocalan, roja Pencşemê bang li PKK kir ku çekên xwe deyne û dawî li hebûna xwe bîne.