Piştî ku êrîşên Tirkiyê bo ser herêmên bakur û rojhilata Sûriyê pêkhatin, sed hezaran kes ji war û malên xwe koçber û derbederbûn, ji sedema alozbûna rewşa li herêmê, sazî û rêxistinên navnetewî û yên alîkarî û piştevaniya xelkê herêmê dikirin derketin û nema karê xwe berdewam bikin.
Piştî ku alîkariyên ji derve û ji aliyê rêxistinên navnetewî qutbûn, Heyva Sora Kurdî li bakur û rojhilata Sûriyê kete nava tevgerê û alîkariyên lezgîn pêşkeş kirin û li hewara koçberan hat.
Herwiha ji Herêma Kurdistana Îraqê Dezgeha Xêrxwazî ya Barzanî alîkarîyên hemreng gihandin wê herêmê.
Bernama "Hello Washington" bo pêzanînên derbarê rewşa niha ya koçber û derbederên Kurdên Sûrî bihê zanîn, mêvandarîya Musa Ahmed Serokê Dezgeha Barzanî yê Xêrxwazî û Kemal Dirbas Endamê Heyva Sor ya Kurdî li bakur û rojhilata Sûriyê kir.
Ahmed da zanîn ku heta niha zêdetirî 18,000 penaberên Sûrî ji sedema êrîşên vê dawiyê yên Tirkiyê û grûbên çekdar yên girêdayî wê xwe gihandine Herêma Kurdistana Îraqê û piraniya wan li kampa Berdereş hatin bicîh kirin.
Ahmed herwiha dibêje, dezgeha wan heta niha 85 kamyonên alîkarîyan ji derman, pêdiviyên rojane û xwarinê gihandine nav axa Sûriyê bo derbeder û koçberan li Hesekê û bajarên din yên Cizîrê.
Dirbas behsa rewşa xerab ya koçberan kir û da zanîn ku zêdetirî 3,000 kes yên ji Serêkaniyê û Girêspî li kampa Waşokanî hatine bicî kirin û pirsgirêka herî mezin niha ewe ku saziyên navnetewî bi temamî li herêmê nemane û saziya navnetewî ya girêdayî Netewên Yekbûyî UNHCR heta niha tiştek bo koçberên nû pêşkeş nekirîye.
